Hátún 6

Tún

Túnin eru hið upphaflega úthverfi Reykjavíkurborgar. Margt hefur breyst og eru þau nánast hluti af miðbænum í dag. Í hverfinu er Waldorfskólinn Sóltún en Laugarnesskóli er ekki langt undan og er hverfisskólinn fyrir börnin sem búa á svæðinu. Nálægðin við Borgartúnið gerir það að verkum að margvísleg þjónusta er innan seilingar hvort sem fólk þarf að fara með skyrtur í hreinsun eða kaupa sér innanhúsmálningu hjá öðlingunum í Slippfélaginu. Í Borgartúni er sérstaklega gert ráð fyrir hjólreiðafólki og þaðan er hægt að hjóla í hendingskasti, beygja framhjá Höfða og bruna Sæbrautina. Bríetartúnið er nútímaleg byggð og göngubrú tengir svæðið við Teigahverfið í Laugardal. Það er því auðvelt aðgengi að útivistarsvæðum og Túnin vel tengd við aðra borgarhluta.