Fell

Stórir hrafnar sveima um Fellin og setja svip á hverfið. Þeir safnast fyrir á húsþökum hverfisins og krunkast á. Fellaskóli er lítill grunnskóli og einkunnarorð hans eru virðing, ábyrgð og vinsemd. Skólinn er fjölmenningarlegur og sérstök áhersla lögð á að bera virðingu fyrir uppruna fólks. Í skólanum er starfrækt deild fyrir nemendur á einhverfurófi. Skammt frá Fellaskóla er Leiknisvöllur og þar við hliðina er Breiðholtslaugin góða. Börnin í hverfinu njóta góðs af stórum opnum svæðum og í hverfinu eru fjórir leikskólar. Reykjavíkurborg hefur nýlega keypt húsnæði í gömlum verslunarkjarna hverfisins en það er liður í uppbyggingarstarfi borgarinnar. Í Drafnarfelli dafnar pólska búðin Mini Market sem liggur á milli kaffihúss hverfisins og Danshallarinnar. Frá Fellunum er auðvelt að taka strætisvagna og vagnarnir flytja fólk á augabragði í Mjóddina þar sem mikla þjónustu er að finna.