Vesturbær

Í Vesturbænum þekkja allir alla. Í vesturbænum er Vesturbæjarskóli en einnig Melaskóli hefur alið margar kynslóðir af Vesturbæingum upp við brjóst sér og steinsnar frá barnaskólanum er unglingaskólinn Hagaskóli. Háskólabíó er staðsett við hliðina á skólanum og því næst kemur Bændahöllin sem rís upp úr malbikinu eins og klettur í hafi. Á efstu hæð er gamla góða Grillið og í kjallaranum er leynibarinn sem eitt sinn hét Mímisbar. Það er ekki hægt að tala um Vesturbæinn án þess að minnast á Vesturbæjarlaugina þar sem fólk hittist og ræðir málin í heitu pottunum og á síðustu árum hefur blómleg þyrping vaxið í grennd við laugina. Þar má nefna Kaffi Vest, bakaríið Brauð og co. ásamt Hagavagninum sem er einstök hamborgarabúlla. Melabúðin er með kjöt- og fiskborð og þar má sjá nágranna heilsast og spjalla uppi við matarkörfurnar.