Stjórn Ölmu íbúðafélags fer með æðsta vald í málefnum félagsins á milli hluthafafunda. Stjórn er kjörin á aðalfundi til eins árs í senn. Starfsárið 2025-2026 skipa eftirtaldir stjórn félagsins:
Gunnar er fæddur 1965 og lauk cand. oecon. prófi í viðskiptafræði frá Háskóla Íslands árið 1989 og MBA prófi frá London Business School árið 1994. Hann er framkvæmdastjóri Langasjávar ehf. og jafnframt stjórnarmaður félagsins. Gunnar er stjórnarformaður Laxárness ehf. og Sólnýjar ehf., auk þess sem hann situr í stjórn Eikar fasteignafélags hf. Hann er einnig stjórnarmaður Coldrock Investments Ltd. og HEGG Holdings Ltd. á Möltu. Á starfsferli sínum hefur Gunnar setið í stjórnum ýmissa skráðra og óskráðra félaga, bæði á Íslandi og erlendis. Hagsmunatengsl hans tengjast eignarhlut hans í móðurfélagi Ölmu, Langasjó ehf., sem á Freyju ehf., Mötu hf., Matfugl ehf., Síld og Fisk ehf. og Salathúsið ehf. sem öll eru leigutakar dótturfélags Ölmu. Gunnar er faðir framkvæmdastjóra félagsins, Ingólfs Árna Gunnarssonar og telst því ekki óháður, sbr. ákvæði 2.3 í 6. útgáfu leiðbeininga um stjórnarhætti fyrirtækja. Að öðru leyti á hann engin sérstök hagsmunatengsl við helstu viðskipta- eða samkeppnisaðila félagsins. Gunnar tók fyrst sæti í stjórn Ölmu í apríl 2021.
Eggert Árni er fæddur 1961 og lauk viðskiptafræði, cand. oecon., frá Háskóla Íslands árið 1989 og prófi í verðbréfaviðskiptum árið 2001. Hann er stjórnarmaður í Langasjó ehf. og nokkrum dótturfélögum Langasjávar, auk þess er hann stjórnarformaður Solid Clouds hf. Hagsmunatengsl Eggerts tengjast eignarhlut hans í móðurfélagi Ölmu, Langasjó ehf. sem á Freyju ehf., Mötu hf., Matfugl ehf., Síld og Fisk ehf. og Salathúsið ehf. sem öll eru leigutakar dótturfélags Ölmu. Eggert er bróðir Gunnars Þórs og frændi Ingólfs Árna Gunnarssonar, framkvæmdastjóra félagsins, og telst því ekki óháður, sbr. ákvæði 2.3 í 6. útgáfu leiðbeininga um stjórnarhætti fyrirtækja. Að öðru leyti á hann engin önnur hagsmunatengsl við helstu viðskipta- eða samkeppnisaðila félagsins. Eggert tók fyrst sæti í stjórn Ölmu í apríl 2021.
Erna er fædd 1968 og lauk B.Sc. í hagfræði frá Háskóla Íslands árið 1991 og MBA frá IESE í Barcelona árið 2004. Hún er forstjóri BL ehf. og starfaði áður sem forstjóri Bifreiða og landbúnaðarvéla hf. árin 2003-2008. Erna var einn af eigendum félagsins og starfaði þar sem framkvæmdastjóri frá árinu 1991. Auk þess situr hún í stjórnum Egg ehf., Eldhúsvara ehf., Umbreytingar slhf. og Hregg ehf. Erna hefur verið varamaður í stjórn Sjóvár frá 2019 en sat áður í stjórn félagsins frá 2009 og var formaður stjórnar frá 2011-2019. Hún sat einnig í stjórn Haga frá 2010-2020. Erna á engin sérstök hagsmunatengsl við helstu viðskipta- eða samkeppnisaðila félagsins. Erna tók fyrst sæti í stjórn Ölmu í apríl 2021.
