Hlíðar

Hlíðarnar hafa fyrir margt löngu fest sig í sessi sem aðlaðandi hverfi. Byggðin er að mestu lágreist, garðarnir grónir og þar er fjöldinn allur af rúmgóðum íbúðum fyrir fjölskyldufólk. Í hverfinu eru hvorki meira né minna en sex leikskólar. Hlíðaskóli sinnir börnum frá fyrsta upp í tíunda bekk og ef börnin hafa ekki fengið sig fullsödd af hverfinu eftir grunnskólann, þá bíður Menntaskólinn við Hamrahlíð eftir þeim með opinn faðminn. Einnig er stutt að fara í Verzlunarskólann fyrir þá sem það kjósa. Klambratúnið er augljós kostur útisvæðisins, þar er hægt að spila körfuknattleik, blak, hangsa á róluvelli eða spila folf. Þegar fólk fær nóg af útivist er ráð að bregða inn á Kjarvalsstaði og skoða myndlist eða bara tylla sér með kaffibolla á kaffistofunni. Hinu megin við hverfið trónir svo Perlan og í kringum hana Öskjuhlíðin með skógarstígum sem liggja niður að Nauthólsvík. Á leiðinni er gaman að skimast um eftir kanínum sem búa í hlíðinni.